Kryeministri Edi Rama njoftoi sot se, duke filluar nga muaji maj, do të nisë një fazë e re për formalizimin e strukturave hoteliere në Shqipëri. Gjatë një takimi me sipërmarrës të rinj në Shkodër, ai theksoi problematikat e sektorit të hoteleri-turizmit, përfshirë platformën Airbnb, në lidhje me deklarimin e fitimeve.
Rama rikujtoi se qeveria ka vendosur TVSH-në më të ulët në Europë për këtë sektor, me një normë prej 6%, për të mbështetur bizneset dhe për të nxitur formalizimin.
Nga maji, do të mundësohet një marrëveshje me tatimet, ku sipërmarrësit mund të deklarojnë 65% të kapaciteteve të zëna për periudhën qershor-gusht, duke shmangur kontrollet tatimore. Sipas Ramës, kjo masë synon të lehtësojë bizneset dhe të shmangë inspektimet e shumta.
Gjithashtu, ai bëri të ditur se për vitin e ardhshëm po punohet për një zgjidhje dixhitale, e cila do të përfshijë edhe Airbnb, duke siguruar formalizimin pa krijuar shqetësime për bizneset.
