“Nuk ka asnjë përpjekje për të shkrirë Orkestrën Simfonike të Shkodrës. E kundërta është e vërtetë.” – Kështu u shpreh kryetari i Bashkisë Shkodër, Benet Beci, në një postim në Facebook, ku sqaroi situatën dhe theksoi investimet e bëra për zhvillimin e mëtejshëm të orkestrës.
Sipas kryetarit Beci, gjatë kësaj periudhe janë krijuar kushte më të mira pune dhe shpërblimi, me honorare mujore të rritura ndjeshëm, një buxhet vjetor të shumëfishuar dhe një set të ri instrumentesh të siguruara pa praktika të dyshimta financiare.
Ai njoftoi gjithashtu një ndryshim në drejtimin e orkestrës, pas përfundimit të kontratës së dirigjentit Jetmir Barbullushi. Duke e falënderuar për kontributin e tij, Beci bëri të ditur se drejtimin e orkestrës e ka marrë dirigjentja dhe pianistja me karrierë ndërkombëtare, Elda Laro, e cila ka dhënë kontribut të çmuar në skenën artistike të Shkodrës dhe tani rikthehet për të kontribuar në qytetin e saj të lindjes.
Kryetari sqaroi gjithashtu se, për të garantuar meritokraci dhe transparencë, është zhvilluar një audicion për pozicionet e orkestrës, bazuar ekskluzivisht në vlerësimin artistik të instrumentistëve. Ai hodhi poshtë çdo pretendim për diskriminim politik, duke theksuar se këto akuza nuk kanë asnjë bazë.
Në postimin e tij, Beci përmendi edhe zhvillimet pozitive në Teatrin “Migjeni”, i cili vitin e kaluar u përball me spekulime për shkrirje, por ka njohur një sezon të suksesshëm me bashkëpunime të rëndësishme dhe rekord vizitorësh në Festivalin Mbarëkombëtar të Humorit. Investimet në teatër po vazhdojnë me projekte për përmirësimin e kushteve për aktorët dhe spektatorët.
Një vëmendje e veçantë po i kushtohet edhe Kinema “Republika”, e cila është shndërruar nga një piceri në një institucion kulturor dhe do të transformohet në një qendër moderne. Po kështu, Orkestra Simfonike po vihet në funksion të plotë me një program të miratuar, buxhete të qarta dhe muzikantë të përzgjedhur mbi bazën e meritës.
“Ne thjesht duam ta bëjmë më të mirë, më dinjitoze, më institucionale Orkestrën e qytetit tonë,” përfundoi kryetari Beci, duke falënderuar të gjithë ata që e kanë mbajtur gjallë këtë institucion ndër vite dhe ata që do të vazhdojnë ta mbështesin dhe ndjekin programin artistik në të ardhmen.
